پائیدار امن، معاشرتی، معاشی وسماجی ترقی کے لئے خواتین کا کردار انتہائی اہم ہے۔ سمیرا ربانی
بہاول پور : (عمران قذافی سے) معاشرتی و سماجی ترقی میں خواتین کاکردار انتہائی اہم ہے۔ پائیدار ترقی اور امن کے لیے خواتین کی کاوشیں کلیدی ہیں۔
ان خیالات کا اظہار ایڈیشنل ڈپٹی کمشنر ہیڈکوارٹر سمیرا ربانی نے بین الاقوامی یوم خواتین کے موقع پر بہاول پور میوزیم اورآرٹس کونسل کے اشتراک سے منعقدہ پینٹگز و آرٹ ورک نمائش کے افتتاح کے موقع پر کیا۔ انھوں نے کہا کہ مضبوط خاندان اور مستحکم معاشرہ کا راز خواتین کے عزت و وقار اور انھیں تحفظ فراہم کرنے میں پوشیدہ ہے۔۔انہوں نے کہا کہ خواتین اپنے ہنر کے ذریعے خاندان اور معاشرے کی بہتری کے لیے اپنا کردار ادا کررہی ہیں۔
انہوں نے مختلف اداروں اور انفرادی حیثیت سے شرکت کرنے والی خواتین کے آرٹ ورک اور پینٹنگز کو سراہا۔ قبل ازیں ڈائریکٹر بہاول پور میوزیم محمد زبیر ربانی نے اظہار خیال کرتے ہوئے کہا کہ خواتین کا عالمی دن کا مقصد ان کی کاوشوں، مساوات، جدوجہد اور خدمات کو خراج تحسین پیش کرنا ہے۔
انہوں نے بتایا کہ بہاول پورآرٹس کونسل کے اشتراک سے منعقدہ چار روزہ نمائش میں گورنمنٹ ووکیشنل ٹریننگ انسٹیوٹ برائے خواتین، گورنمنٹ گریجویٹ کالج برائے خواتین سیٹلائٹ ٹاؤن، گورنمنٹ ٹیکنالوجی کالج برائے خواتین کی تیار کردہ ثقافتی و آرائشی اشیاء اور پینٹنگز کا ڈسپلے کیا گیا ہے۔
اس کے علاوہ انفرادی حیثیت سے شرکت کرنے والی گھریلو خواتین، اساتذہ کرام، طالبات اور مختلف محکموں میں خدمات سرانجام دینے والی آرٹسٹوں کے فن پارے بھی نمائش میں رکھے گئے ہیں۔ انہوں نے بتایا کہ کہ اس نمائش میں بشری اسلم، شمع عاصم، انعم امتیاز، آمنہ، عظمی کنول، رابعہ صدیق، صبا اکبر، ثانیہ، مقدس، حناء، سویرا ستار اور نگہت کے فن پارے ان کی صلاحیتوں کواجاگر کر رہے ہیں۔ تقریب میں مس نگہت اسلم، مسز عنبر تنصیر، ربیعہ صدف، سمیت طالبات کی بڑی تعداد نے شرکت کی۔