شہداء پولیس ہمارے محکمہ کا فخر ہیں۔آرپی او بھاولپور رائے بابرسعید
یوتھ ویژن نیوز: آرپی او رائے بابر سعید کی ڈی پی او بہاولپور سید عباس شاہ کے ہمراہ شہداء پولیس کی فیملیز سے ملاقات۔تفصیل کیمطابق شہداء پولیس کے اعزاز میں ایک تقریب کا انعقاد کیا گیا۔
ریجنل پولیس آفیسر رائے بابر سعید نے پولیس کے شہداء سے ملاقات کرتے ہوئے ان کے مسائل دریافت کئے،ان کے بچوں سے ان کی تعلیمی صورتحال کے حوالے سے بات چیت کی۔آرپی او نے گفتگو کرتے ہوئے کہا کہ ہماری پولیس ملک و قوم کی حفاظت کیلئے دن رات ڈیوٹی کے فرائض سرانجام دے رہی ہے۔
آپ کے والدنے ملک کی خاطر جان قربان کر کے جو عظیم قربانی دی ہے اس کا قرض ہم پوری زندگی ادا نہیں کر سکتے۔ شہداء پولیس کے ورثاء ہماری ذمہ داری ہیں، آپ کو کبھی بھی تنہا نہیں چھوڑیں گے، آپ کے بچوں کے مستقبل کو محفوظ اور انہیں معاشرہ میں کامیاب شہری بنانا ہمارا مشن ہے۔
اس مقصد کیلئے شہداء کے بچوں کو ضلع کے بہترین سکولز صادق پبلک سکول اورآرمی پبلک سکول میں تعلیم دلوائی جا رہی ہے اور اس سلسلہ کو مزید بہتربنانے کیلئے کوشاں ہیں۔شہداء فیملیز کی ویلفیئر،ان کی ضروریات کا خیال رکھنا اور ہر خوشی غمی میں شریک ہونا ہم پر لازم ہے اور آپ ہمیں ہر خوشی وغمی میں اپنے ساتھ پائیں گے۔
آر پی او نے مزید کہا کہ میں آپ کو یہ پیغام دینا چاہتا ہوں کہ یہ آپکی اپنی پولیس ہے،ہم آپ لوگوں کا ہی حصہ ہیں۔ہم آپکی خدمت،آپکے مسائل،آپ کے جان ومال کی حفاظت کیلئے دن رات کام کر رہے ہیں اور کرتے رہیں گے۔ڈی پی او بہاولپور سید عباس شاہ نے گفتگو کرتے ہوئے کہا کہ پولیس کے جوان دہشت گردی،جرائم پیشہ عناصر کی بیخ کنی کیلئے ہمہ وقت سینہ سپر ہیں اور شہریوں کی حفاظت امن و سلامتی کیلئے کسی بھی قسم کی قربانی سے دریغ نہیں کریں گے۔ شہداء پولیس ہمارے ماتھے کا جھومراورمحسن ہیں۔ہم اپنے شہداء کے لواحقین کے دکھ سکھ کے ضامن ہیں۔
اللہ تعالیٰ کے حضور دعا ہے کہ وہ ہماری قربانیوں کو قبول فرمائے اور مزید جذبہ سے فرائض سرانجام دینے کی توفیق عطاء فرمائے۔ آمین۔