امیرقطرنے وزیراعظم شہبازشریف کی دورہ پاکستان کی دعوت قبول کرلی
یوتھ ویژن نیوز: وزیراعظم شہبازشریف کی دوحہ میں امیر قطر شیخ تمیم بن حمد آل ثانی سے ملاقات ،دو طرفہ باہمی مفاد کے امور پر تبادلہ خیال کرتے ہوئے ،دورہ پاکستان کیدعوت بھی قبول کرلی۔
تفصیلات کے مطابق وزیر اعظم شہبازشریف اور امیر قطر شیخ تمیم بن حمد آل ثانی کی ون آن ون ملاقات ہوئی ۔ پاکستان اور قطر کے درمیان معاشی اور سرمایہ کاری سمیت تعاون کو مزید بڑھانے کے طریقوں پر بات چیت بھی کی گئی۔
امیر قطر نے قطر کی ترقی میں پاکستانی محنت کشوں کی کاوشوں کو سراہا اور فیفا ورلڈ کپ کے کامیاب انعقاد کے موقع پر پاکستانی سکیورٹی حکام کی شاندار کارکردگی کی تعریف بھی کی۔
وزیراعظم شہبازشریف نے بھی پاکستان کی ترقی کے منصوبوں میں قطر کی مسلسل حمایت پر اظہار تشکر کیا۔
وزیراعظم شہبازشریف نے دونوں ممالک کے درمیان تعاون بڑھانے کے وسیع مواقعوں کو اجاگر کیا۔ سرمایہ کاری، تجارتی اور پاکستان سے ہنر مند افراد کی قطر برآمد کے طریقوں اور ذرائع بڑھانے پر بات چیت بھی کی گئی۔
امیرقطر کا وزیراعظم شہبازشریف کے دورہ کا خیرمقدم، دونوں ممالک کے درمیان معاشی تعاون بڑھانے میں گہری دلچسپی کا اظہار کیا۔
وزیراعظم نے امیر قطر کو دورہ پاکستان کی دعوت دی جسے انہوں نے قبول کرلیا۔