محسن نقوی کا عالمی تبلیغی مرکزرائے ونڈ کا دورہ، مسجد نبویؐ کے ماڈل پرمسجد تعمیر کرنے کی تجویز

یوتھ ویژن نیوز : نگران وزیراعلیٰ پنجاب محسن نقوی نے عالمی تبلیغی مرکزرائے ونڈ کا دورہ کیا۔

وزیراعلیٰ محسن نقوی نے عالمی تبلیغی جماعت کے علماء کرام مولانا احمد لاٹ، مولانا فاروق اور دیگر اکابرین سے ملاقات کی۔ وزیراعلیٰ محسن نقوی کو دین اسلام کی تبلیغ کے لئے سرگرمیوں کے بارے میں آگاہ کیا گیا۔

یہ بھی پڑھیں: فٹ بال ورلڈ کپ اسکواڈ کیلئے سونے کے آئی فونز14ایس کے تحفے

وزیراعلیٰ محسن نقوی نے اس موقع پر گفتگو کرتے ہوئے کہا کہ تبلیغی جماعت دین اسلام کی تبلیغ کے لئے گراں قدر خدمات سرانجام دے رہی ہے، علماء کرام کی دین اسلام کیلئے خدمات کو سراہتے ہیں۔اللہ تعالیٰ کے دین کو پھیلانے والے دین اوردنیا دونوں کما رہے ہیں۔ مولانا احمد لاٹ اور مولانا فاروق نے عالم اسلام کے اتحاد، دین اسلام کی سر بلندی، امن اور استحکام کیلئے دعا کی۔

اس موقع پر عالمی تبلیغی مرکز میں مسجد نبویؐ کے ماڈل پر 10 لاکھ نمازیوں کے لئے مسجد تعمیر کرنے کی تجویز پیش کی گئی۔ وزیراعلیٰ محسن نقوی نے مسجد نبویؐ کے ماڈل پر مسجد کی تعمیر کے منصوبے میں تعاون کی یقین دہانی کراتے ہوئے کہا کہ اللہ تعالیٰ بھی نیک کام میں برکت ڈالتے ہیں۔

یہ بھی پڑھیں: رہائی ملتے ہی لیفٹیننٹ جنرل (ر) امجد شعیب ایک اور مشکل میں پھنس گئے

اللہ تعالیٰ کے فضل و کرم سے اس تجویز پر ابتدائی بات ہوئی ہے اور انشاء اللہ یہ نیک کام آگے بڑھے گا۔اس موقع پر مسجد کی تعمیر کے لئے نیت کرنے پر خصوصی دعا کی گئی۔ عالمی تبلیغی جماعت کے ڈاکٹر ندیم اشرف، امتیاز غنی، انوار غنی، میاں احسن، صوبائی وزیر اوقاف اظفر علی ناصر، صنعتکار گوہر اعجاز، کمشنر لاہور ڈویژن اور دیگر اکابرین بھی اس موقع پر موجود تھے۔