میدانی علاقوں طوفانی بارشیں،پہاڑیوں پربرف باری اور لینڈ سلائنڈنگ کا الرٹ جاری
ماہ فروری میں بڑھتے درجہ حرارت سے پریشان شہریوں کیلئےخوشبخری،جمعرات اور جمعہ سےمغربی اور بالائی علاقوں میں تیز ہواؤں اور گرج چمک کے ساتھ بارش اور پہاڑوں پر برفباری کی پیشگوئی کردی گئی۔
محکمہ موسمیات کے مطابق مغربی ہوائیں8فروری رات کو ملک کے مغربی علاقوں میں داخل ہونگی ۔9 فروری کو ملک کے بالائی علاقوں تک پھیل جائیں گی اور 10 فروری تک شمالی علاقہ جات پر موجود رہیں گی۔
پی ڈی ایم اے کے الرٹ کے مطابق 9اور10 فروری کے دوران اسلام آباد ، لاہور ، گوجرانوالہ، گجرات، حافظ آباد،منڈی بہاؤالدین، سیالکوٹ ،نارووال،فیصل آباد، ٹوبہ ٹیک سنگھ، جھنگ، قصور، شیخوپورہ ،ننکانہ صاحب ، خوشاب، میانوالی اور سرگودھا میں بھی تیز ہواؤں اور گرج چمک کے ساتھ بارش کی توقع ہے۔
ترجمان پی ڈی ایم اے کے مطابق بارش کے ساتھ چند مقا مات پر ژالہ باری بھی ہو سکتی ہے۔
پی ڈی ایم اے کے کاکہنا ہے کہ 8سے10فروری کے دوران مری میں درمیانی سے شدید برفباری متوقع ہے۔برفباری سے سڑکیں بند اور گاڑیوں کی آمد ورفت میں خلل پیدا ہو سکتا ہے۔اسی دوران مری میں لینڈسلائیڈنگ کا بھی خدشہ ہے۔سیاح بارش اور برفباری کے دوران محتاط رہیں اور غیر ضروری سفر سے اجتناب کریں۔
ترجمان کاکہنا ہے کہ بارشوں کے دوران ہنگامی صورتحال سے نمٹنے کے لیے تمام ادارے 24/7 الرٹ ہیں۔برف ہٹانے کے لیے ہیوی مشینری اور سٹاف کی مختلف شفٹوں میں ڈیوٹیاں لگائی گئی ہیں۔ مری میں سیاحوں کی سہولت کے لیے فسیلیٹیشن سنٹرز بھی مکمل فعال ہیں۔کنٹرول رومز سے مری کی صورتحال کی مسلسل مانیٹرنگ کی جا رہی ہے۔
