وزیراعظم شہبازشریف کی جنیوا میں نوازشریف اور مریم نواز سے ملاقات،وجہ سامنے آگئی
وزیر اعظم شہبازشریف نے جنیوا میں مسلم لیگ (ن) کے قائد و سابق وزیر اعظم میاں نواز شریف اور سینئر نائب صدر مریم نواز سے ملاقات کی ،اس ملاقات میں وفاقی وزیر خزانہ سینیٹر اسحاق ڈار بھی موجود تھے ۔
وزیراعظم شہباز شریف اور نواز شریف کے درمیان ملاقات رات کے کھانے پر ہوئی ۔ وزیر اعظم شہباز شریف نے نواز شریف اور فیملی کے ساتھ تقریبا 2 گھنٹے کا وقت گزارا۔ اس موقع پر شہباز شریف نے مریم نواز کی صحت بارے دریافت کیا اور پارٹی عہدہ سنبھالنے پرمبارکباد بھی پیش کی ۔پارٹی ذرائع کے مطابق اہم ملاقات میں پارٹی اور سیاسی امور پر تفصیلی تبادلہ خیال کیا گیا ۔ مسلم لیگ ن کو فعال اور متحرک کرنے کے لئے بعض اہم فیصلوں کی منظوری دی گئی جس کے تحت مریم نواز کو پارٹی سے متعلق فیصلوں کے لئے مکمل فری ہینڈ دیا جائے گا۔ذرائع کے مطابق مریم نواز اس ماہ کے آخر میں پاکستان پہنچ جائیں گی ۔
شہباز شریف نے عالمی رہنماﺅں سے ہونے والی ملاقاتوں اورعالمی کانفرنس کے مثبت ریسپانس پر نواز شریف کو اعتماد میں لیا۔ ملاقات میں پارٹی امور اورملک کی مجموعی سیاسی ،معاشی صورتحال پر تفصیلی تبادلہ خیال کیا گیا ۔ ملاقات میں پارٹی کو فعال اور متحرک کرنے سے متعلق امور پر بھی گفتگو کی گئی جبکہ پنجاب کی صورت حال پر بھی تبادلہ خیال کیا گیا۔ ذرائع نے بتایا کہ نواز شریف نے سیاسی اور معاشی صورتحال میں بہتری کیلئے ضروری احکامات بھی جاری کئے ہیں۔ ذرائع کا کہنا ہے کہ نواز شریف نے رواں ماہ کے آخر تک مریم نواز کے وطن واپسی سے متعلق شہباز شریف کو آگاہ کیا ۔
