سیاست نہیں ریاست کو بچانا ہے، عارف علوی اور پرویز الہیٰ میں اتفاق
پنجاب اسمبلی تحلیل ہوگی کہ نہیں ، صدر اور وزیراعلی پنجاب میں تبادلہ خیال ۔وزیراعلیٰ پنجاب چودھری پرویزالٰہی نے صدر مملکت ڈاکٹر عارف علوی کا وزیر اعلی آفس آمد پر استقبال کیا۔
صدر مملکت ڈاکٹر عارف علوی اور وزیراعلیٰ پنجاب چودھری پرویزالٰہی، سابق وفاقی وزیر مونس الٰہی اور ایم این اے حسین الٰہی کی ملاقات ہوئی جس میں باہمی دلچسپی کے امور اور سیاسی صورتحال پر تبادلہ خیال کیا ۔
رپورٹ کے مطابق ملاقات میں پنجاب اسمبلی تحلیل کرنے کے متلعق مشاورت کی گئی ۔وزیراعلیٰ چودھری پرویز الٰہی نے صدر ڈاکٹر عارف علوی کو پنجاب میں جاری ترقیاتی منصوبوں سے آگاہ کیا۔
وزیراعلیٰ چودھری پرویز الٰہی نے ڈاکٹر عارف علوی کو صوبے کے عوام کے ریلیف کیلئے کئے جانے والے اقدامات کے بارے میں بریف کیا اور پنجاب میں جاری ترقیاتی منصوبوں سے آگاہ کیا۔ وزیراعلی پنے
معیشت کی خراب صورتحال پر گہری تشویش کا اظہار کرتے ہوئے وفاقی حکومت کی ناقص پالیسیوں پر کڑی تنقید کی ۔ ان کا کہنا تھا کہ چند ماہ کے اندر ہی وفاقی حکومت پاکستان کو اقتصادی لحاظ سے کئی برس پیچھے لے گئی ہے۔معیشت روز بروز گر رہی ہے اور یہ اپنے اقتدار کو طول دینا چاہتے ہیں۔وفاق پر مسلط نااہل ٹولہ صرف اپنی سیاست بچانے میں لگا ہوا ہے۔ وزیراعلی چودھری پرویز الٰہی کا کہنا تھا کہ آج ریاست بچانے کا سوال سب سے پہلے ہے۔موجودہ حالات میں سب کو پاکستان کیلئے سوچنا ہوگا۔
انہوں نے ایک دفعہ پھر ببانگ دہل اعلان کیا کہ ہم عمران خان کے ساتھ ہیں۔اورپنجاب کی وزارت اعلیٰ عمران خان کی امانت ہے۔ جبکہ صدر مملکت ڈاکٹرعارف علوی کا کہنا تھا کہ ہمیں پاکستانی بن کر صرف پاکستان کا ہی سوچنا ہے۔ سیاست میں کوئی چیز حرف آخر نہیں ہوتی، صورتحال کے تحت فیصلے کرنا ہوتے ہیں۔ انہوں نے کہا کہ پاک وطن ہم سے اتحاد، یگانگت اور سیاسی رواداری کا تقاضا کر رہا ہے۔معاملات کو خوش اسلوبی سے حل کرنے کیلئے کوشاں ہیں۔اللہ تعالیٰ سے پوری امید ہے کہ پاکستان کیلئے بہتر راستہ نکل آئے گا۔ صدر مملکت نے وزیراعلی پنجاب کو خراج تحسین پیش کرتے ہوئے کہا کہ چودھری پرویز الٰہی مدبر سیاستدان ہیں اور سیاسی امور پر صائب رائے رکھتے ہیں۔ ان سے انتہائی خوشگوار ماحول میں اہم امور پر سیر حاصل گفتگو ہوئی۔
