عام انتخابات کی تاریخ نہ ملی تو اسمبلیاں توڑ دیں گے،عمران خان
یوتھ ویژن نیوز (مظہر چشتی سے )چیئر مین تحریک انصاف عمران خان نےکہا ہے کہ پنجاب اور خیبرپختونخوا کی اسمبلیاں تحلیل کرنے کا فیصلہ کرلیا ہے،اگر عام انتخابات کی تاریخ نہ دی گئی تو اسمبلیاں توڑدیں گے ۔
تفصیلات کے مطابق چیئرمین تحریک انصاف عمرا ن خان نےخیبرپختونخوا کی پارلیمانی پارٹی اجلاس سے ویڈیو لنک خطاب میں کہا ہے کہ میرے کل کے بیان سے پی ڈی ایم کو غلط فہمی ہوئی،میں نے سمجھانے کی کوشش کی لیکن شائد غلط پیغام چلا گیا ، میں نے کوئی مذاکرات کی پیشکش نہیں کی ، وزیر اعلیٰ پنجاب چوہدری پرویز الہٰی نے مجھے اسمبلی توڑنے کا اختیار دے دیا ہے،الیکشن جب بھی ہوتے ہیں جیتنا پی ٹی آئی نے ہی ہے۔75 فیصد پاکستانی الیکشن کا کہہ رہے ہیں۔ہم اسی ماہ صوبائی حکومتوں کو تحلیل کر کے الیکشن کی طرف جائیں گے۔الیکشن کمیشن ان کے ساتھ ملا ہوا ہے، پی ڈی ایم کے لوگوں نےملک سے باہر چلے جانا ہے۔
سابق وزیراعظم عمران خان نے خطاب میں کہا کہ اگر حکومت جنرل الیکشن کی تاریخ دینا چاہتی ہے تو ہم بات چیت کے لیے تیار ہیں، ملک کی ضرورت ہے کہ ملک میں سیاسی استحکام آئے، سیاسی استحکام آئے گا تب ہی معاشی استحکام آئےگا، ان سے بات چیت کس چیز پر ہوگی، ہوہی نہیں سکتی، ان کا حکومت میں آنے کا مقصد کیا تھا۔ان کی کوشش یہی ہےکہ اب یہ الیکشن جیت نہیں سکتے تو تاخیر کررہے ہیں۔
سابق وزیر اعظم عمران خان کا کہنا ہے کہ مفتاح اسماعیل کہہ رہے ہیں، اسحاق ڈار ملک کو ڈیفالٹ پر لے جارہے ہیں،مفتاح اسماعیل اور اسحاق آپس میں لڑ رہے ہیں، دونوں ایک دوسرے پر سچے الزامات لگا رہے ہیں،یہ لوگ جہاں بھی جاتے ہیں چور چور کے نعرے لگتے ہیں، اسمبلیاں تحلیل کرنے کا فیصلہ کر لیاہے ، 66 فیصد نشستیں خالی ہوں تو ملک کو عام انتخابات کی طرف جانا پڑے گا۔ سابق وزیر اعظم عمران خان کا کہنا ہے پہلے یہ اپنی چوری مشرف سے این آر او لے کر معاف کروا چکے تھے ، اب انہوں نے دوسرا این آراو لیا ، ان کے ہینڈلرز سہولت کار بنے این آر او لینے کیلئے ، جنرل مشرف نے ان دونوں پارٹیز سے ملک کو بہتر چلایا تھا ، 75 فیصد قوم کو پتا ہے کہ الیکشن کے علاوہ کوئی اور دوسرا راستہ نہیں ہے ، ہم کے پی اور پنجاب کی اسمبلیاں توڑنے جارہے ہیں، ہم یہ سمجھتے ہیں کہ ملک کو الیکشن کی ضرورت ہے ، جب بھی الیکشن ہوں گے تو پی ٹی آئی جیتے گی، ان کا گراف تیزی سے نیچے جا رہا ہے ۔