بھاولپور میں پولیوسے بچاو کی سہ روزہ مہم 28 نومبر سے شروع ہوگی،ڈپٹی کمشنر زاہد پرویز

بہاول پور(عمران قذافی سے ))پولیو سے بچاؤ کی سہ روزہ مہم ضلع بھر میں 28نومبر سے شروع ہو گی۔ اس دوران پانچ سال تک کی عمر کے 7لاکھ 99ہزار سے زائد بچوں کو گھر گھر جا کر پولیو سے بچاؤ کی ویکسین پلائی جائے گی

۔ اس سلسلہ میں انتظامات کا جائزہ لینے کے لئے اجلاس ڈپٹی کمشنر زاہد پرویز وڑائچ کی زیر صدارت دفتر میں منعقد ہوا۔اس موقع پر اسسٹنٹ کمشنر رابطہ ایوشہ ظفر، ڈپٹی ڈسٹرکٹ ہیلتھ آفیسرز سمیت متعلقہ محکموں کے افسران شریک ہوئے۔ ڈپٹی کمشنر نے کہا کہ پولیو سے بچاؤ کی مہم کے دوران پانچ سال تک کی عمر کا ایک بچہ بھی پولیو کی خوراک سے محروم نہ رہے۔ انہوں نے کہا کہ پولیو سے بچاؤ مہم کے دوران تشکیل دی گئی ٹیموں کے ارکان اپنی ذمہ داریاں شاندار انداز میں انجام دیں۔ انہوں نے کہا کہ پولیو ٹیموں کے ارکان کی فیلڈ میں کارکردگی کا جائزہ لینے کے لئے موثر انداز میں مانیٹرنگ کی جائے۔ ڈپٹی کمشنر نے ضلع کی تمام تحصیلوں میں پولیو سے بچاؤ مہم کے لئے کئے گئے انتظامات کا جائزہ لیا اور ہدایت کی کہ مہم کے دوران تمام متعلقہ افراد اپنی ذمہ داریاں بہتر طریقہ سے ادا کریں۔ اس سلسلہ میں کسی قسم کی سستی اور غفلت نہ برتی جائے۔ انہوں نے کہا کہ ڈسٹرکٹ کنٹرول روم میں محکمہ صحت، پولیس اور دیگر متعلقہ محکموں کے متعلقہ ملازمین انسداد پولیو مہم کے دوران اپنی ذمہ داریاں مستعدی سے انجام دیں۔ ڈپٹی کمشنر نے ہدایت کی کہ چولستان اور دیگر دور افتادہ علاقہ جات میں پولیو سے بچاؤ مہم کے دوران متعلقہ ڈاکٹرز وہاں پر موجود بیمار افراد کو علاج معالجہ کی سہولت اور ادویات کی فراہمی میں اپنی خدمات سرانجام دیں۔ ڈسٹرکٹ ہیلتھ آفیسر ڈاکٹر خالد محمود آرائیں نے بریفنگ میں بتایا کہ 28نومبر سے 30نومبر تک پولیو بچاؤ مہم کے دوران پولیو ٹیمیں گھر گھر جا کر پانچ سال تک کی عمر کے بچوں کو پولیو سے بچاؤ کے قطرے پلائیں گی اور اس دوران کسی وجہ سے رہ جانے والے بچوں کو کیچ اپ ایکٹیویٹی کے تحت یکم اور 2دسمبر کو پولیو سے بچاؤ کے قطرے پلائے جائیں گے۔ ڈاکٹر شیراز نے بتایا کہ اس مہم کو کامیابی سے ہمکنار کرنے کے لئے 3168موبائل ٹیمیں، 195فکسڈ ٹیمیں اور 136ٹرانزٹ ٹیمیں تشکیل دی گئی ہیں۔