عملی سیاست حقیقی ترقی اور فلاحی معاشرے کی تعمیرہے،احمد ندیم اعوان
کراچی ( محمد افضل سے) اللہ اکبر تحریک کراچی کے صدر احمدندیم اعوان نے کہا ہے کہ ہم عملی سیاست میں حقیقی ترقی اور فلاحی معاشرے کی تعمیر کے لیے میدان میں آئے ہیں۔ ہماری سیاست کا ہدف عوام کےمسائل کو اس کی دہلیز پر حل کرنا ہے۔ بلدیاتی انتخابات میں کرسی کے نشان پر کھڑا ہمارا ہرامیدوار باکردار، دیانتداراور خدمت گزار ہے۔ انتخابات کی تیاریوں کے سلسلے میں پارٹی عہدے داران کے اہم اجلاس سے زونل دفتر گلشن اقبال میں خطاب کرتے ہوئے احمدندیم اعوان کا کہنا تھا کہ ہم نے کبھی نفرت اور تفرقے کی سیاست نہیں کی اور نہ ہی ایسی سیاست پر یقین رکھتے ہیں۔ انسانیت کی خدمت ہمارا مشن ہے۔ اللہ اکبر تحریک کےامیدوار اور کارکنان پرامن ماحول میں خدمت کا جذبہ لے کر اپنی انتخابی مہم کا آغاز کریں ۔عوامی مسائل کو مقامی سطح پر حل کرنا ضروری ہے۔ماضی میں ہم نے اختیارات واقتدارنہ ہونے کے باوجود علاقائی مسائل کو حل کرنے میں اپنا کلیدی کردار ادا کیا۔ ان شاءاللہ مستقبل میں بھی اپنا کردار ادا کریں گے۔ بلدیاتی اداروں کی کارگردگی پر گفتگو کرتے ہوئےاحمد ندیم اعوان کا کہنا تھا کہ حالیہ ہونےوالی بارش سے تباہی اور حکمرانوں کی نااہلی سب کے سامنے ہے۔ کئی ہفتےگزرنے کے باوجود کراچی کی عوام اب بھی صفائی کے ناقص انتظامات کا سامنا کررہی ہے۔ مچھروں کی افزائش سےعوام کو صحت کے مسائل کا سامنا ہے۔ ہمیں عوام کے مسائل حل کرنےکے لیے آپس کی رنجشیں بھلا کر خدمت خلق کا جذبہ لے کر عوام کی خدمت کرنا ہوگی۔ ہم خدمت عبادت سمجھ کرکرتے ہیں ۔ہماری سیاست ہی خدمت انسانیت ہے۔ ہم وطنوں کی مشکل وقت میں مددکےلیے اللہ اکبر تحریک والے ہی مدد میں سب سے آگے تھے ۔