پاکستان -ترکمانستان کے مابین تجارتی اور اقتصادی روابط بڑھانے کیلئے ٹھوس اقدامات کی ضرورت ہے ، صدر مملکت

اشک آباد ، (عمران منیر قذافی سے) صدر مملکت ڈاکٹر عارف علوی نے ترکمانستان کے صدر گربنگولی بردی محمدوف سے اشک آباد میں ملاقات کے دوران پاکستان اور ترکمانستان کے مابین وسیع تر روابط کی مددسے تجارتی اور اقتصادی تعاون بڑھانے کیلئے ٹھوس اقدامات کی ضرورت پر زور دیتے ہوئے کہا کہ دونوں ممالک کے مابین تجارت، سیاحت اور عوامی رابطوں کے فروغ کے لیے سڑکوں ، ریل اور ہوائی رابطے ضروری ہیں۔ انہوں نے تاپی گیس پائپ لائن منصوبے کی بروقت تکمیل کے لیے پاکستان کی مسلسل حمایت کا اعادہ بھی کیا ۔
ملاقات کے دوران دونوں رہنماؤں نے علاقائی امن و سلامتی بالخصوص افغانستان میں بگڑتی معاشی اور انسانی صورتحال پر تبادلہ خیال کیا ۔ صدر مملکت ڈاکٹر عارف علوی نے افغانستان میں سردیوں کے تناظر میں سنگین انسانی صورتحال پر روشنی ڈالتے ہوئے کہا کہ بین الاقوامی برادری کی جانب سے فوری خوراک، ادویات اور پناہ کی فراہمی کے لیے افغانستان کے ساتھ عملی روابط قائم کرنے کی ضرورت ہے ۔ ان کا کہنا تھا کہ افغانستان کو معاشی تباہی سے بچانے کے لیے فوری مالی امداد ضروری ہے اور اس سلسلے میں افغانستان کے منجمد مالیاتی اثاثوں کو غیر منجمد کرنا ہوگا۔ انہوں نے کہا کہ افغانستان میں پائیدار امن و استحکام علاقائی روابط اور خطے کی خوشحالی کے لیے ناگزیر ہے۔
ملاقات کے دوران دونوں رہنماؤں نے مشترکہ دلچسپی کے تمام امور پر رابطے میں رہنے پر اتفاق کیا۔ دونوں صدور نے باہمی دلچسپی کے تمام شعبوں میں دو طرفہ روابط مزید بڑھانے پر زور دیا۔
صدر مملکت کی ترکمانستان کی آزادی کے 30سال اور انکی "مستقل غیرجانبداری” کی پالیسی کی 25ویں سالگرہ پر مبارکباد دی اور ترکمانستان کے صدر بردی محمدوف کو پاکستان کا جلد دورہ کرنے کی دعوت بھی دی۔