مارچ 2022 تک یورپ میں کورونا سے مزید 7لاکھ ہلاکتوں کا خدشہ، عالمی ادارہ صحت

جنیوا۔ (ثاقب ابراہیم غوری سے): عالمی ادارہ صحت (ڈبلیو ایچ او) نے مارچ 2022 تک یورپ میں کورونا وائرس سے مزید 7لاکھ ہلاکتوں کا خدشہ ظاہر کیا ہے ۔

فرانسیسی خبر رساں ادارے کے مطابق عالمی ادارہ صحت نے حالیہ عرصے میں یورپ میں کورونا وائرس کیسز کی تعداد میں اضافے پر تشویش کا اظہار کرتے ہوئے کہا ہے کہ اگر یہی صورت حال رہی تو مارچ 2022 تک کورونا وائرس سے ہونے والی ہلاکتوں کی تعداد 15 لاکھ سے بڑھ کر 22 لاکھ تک پہنچ سکتی ہے۔

عالمی ادارہ صحت کا کہنا ہے کہ کورونا کیسز میں اضافے کے باعث ہسپتالوں کے خصوصی نگہداشت کے شعبوں پر دبائومیں اضافے کا بھی خدشہ ہے۔ واضح رہے کہ حالیہ کچھ عرصے میں یورپ میں کورونا وائرس کیسز میں واضح اضافہ سامنے آیا ہے اور جرمنی، برطانیہ، ہالینڈ اور آسٹریا میں متاثرہ افراد کی تعداد میں اضافہ ہوا ہے جس کے بعد حکومتوں کی جانب سے نئی پابندیاں بھی لگائی جارہی ہیں۔