سعودی اقامہ ہولڈرز اور عمرہ زائرین کیلئے بڑی خوشخبری

اسلام آباد (واصب ابراہیم غوری سے ) سعودی عرب نے پاکستان سے براہ راست پروازوں پر عائد پابندی ختم کر دی۔ اس خبر کا اعلان وفاقی وزیر برائے مذہبی امور و بین المذاہب ہم آہنگی پیر نور الحق قادری جمعرات کو روزنامہ یوتھ ویژن سے خصوصی گفتگو کرتے ہوئے کیا۔ وفاقی وزیر کا کہنا تھا کہ سعودی وزارت داخلہ کے مطابق پاکستانی مسافروں پر دوسرے ملک میں 14 دن قرنطینہ کی پابندی ختم کر دی گئی۔ پاکستانی مسافروں کو سعودی عرب میں داخلے کے بعد 5 دن ادارتی قرنطینہ کرنا ہو گا۔ انہوں نے مزید کہا کہ اس فیصلہ سے پاکستانی زائرین کیلئے عمرہ بحالی کی راہ ہموار ہو گئی۔ اور یہ کہ پابندی پر خاتمے کا اطلاق یکم دسمبر، 2021 بروز بدھ سے ہو گا۔ سعودی حکومت کے اس فیصلہ سے انڈونیشیا، برازیل، ویتنام، مصر، بھارت پر بھی پابندی ختم کی جائے گی: سائنو فام اور سائنو ویک ویکسین کے حامل افراد کو منظور شدہ ویکسین کی بوسٹر شاٹ لگوانا ہو گی۔ سعودی حکام کی وضع کردہ دیگر کرونا SOPs کی پابندی لازم ہو گی۔ وفاقی وزیر کہا کہنا تھا کہ پابندی کے خاتمے پر خادم حرمین شریفین کے شکر گذار ہیں۔اور انکے ساتھ ساتھ سعودی وزارت حج اور سعودی سفیر نواف سعید المالکی کا بطور خاص شکریہ ادا کرتا ہوں۔ انہوں نے عمرہ زائرین کے حوالے سے سوال پر اس بات کا اعادہ بھی کیا کہ وہ عمرہ زائرین کیلئے 5 دن ادارتی قرنطینہ کی پابندی ختم کرانے کی کوشش کرینگے۔