اپوزیشن عدلیہ اور فوج کے خلاف مہم چلانا بند کرے، نواز شریف یا مریم نواز کے مقدمات چلتے ہیں تو کوئی لیک یا ویڈیو سامنے آ جاتی ہیں لیکن رسیدیں نہیں آتیں جن کا پوری قوم کو انتظار ہے، وفاقی وزیر اطلاعات چوہدری فواد حسین کی میڈیا سے گفتگو

اسلام آباد۔(ثاقب ابراہیم غوری سے): وفاقی وزیر اطلاعات و نشریات چوہدری فواد حسین نے کہا ہے کہ اپوزیشن فوج اور عدلیہ کے خلاف مہم چلانا بند کرے، جب بھی نواز شریف یا مریم نواز کے مقدمات عدالتوں میں چلنا شروع ہوتے ہیں تو کوئی لیک سامنے آ جاتی ہے یا ویڈیو، نہیں آتی تو رسیدیں سامنے نہیں آتیں جن کا پوری قوم کو انتظار ہے، عدالتوں نے انہیں کئی مواقع دیئے، ثبوت ہوتے تو یہ پیش کرتے، نواز شریف اور آصف علی زرداری کی کرپشن کا بچے بچے کو پتہ ہے، آئین پاکستان میں دونوں اداروں کو تحفظ حاصل ہے، ای وی ایم اور اوورسیز پاکستانیوں کو ووٹنگ کا حق دینے کے حوالے سے قانون بن چکا ہے، الیکشن کمیشن ای وی ایم کے ذریعے شفاف انتخابات کرانے کیلئے اپنی ذمہ داری ادا کرے، آئی ایم ایف پروگرام منظور ہو چکا ہے، پاکستانی معیشت کو استحکام ملا ہے۔ ان خیالات کا اظہار انہوں نے پیر کو یہاں میڈیا سے گفتگو کرتے ہوئے کیا۔ وفاقی وزیر اطلاعات نے کہا کہ جب بھی نواز شریف یا مریم نواز کے مقدمات عدالتوں میں چلنا شروع ہوتے ہیں تو کوئی لیک یا ویڈیو تو سامنے آ جاتی ہے لیکن رسیدیں سامنے نہیں آتیں جن کا پوری قوم انتظار کر رہی ہے۔ انہوں نے کہا کہ پانامہ سکینڈل میں دنیا کے بدترین حکمرانوں کے نام آئے، نواز شریف کا نام بھی ان میں شامل تھا۔ شریف خاندان نے لندن اپارٹمنٹس کے حوالے سے غلط بیانی سے کام لیا، لندن میں ان کے چار اپارٹمنٹس موجود ہیں جہاں شاید برطانیہ کا وزیراعظم بھی اپارٹمنٹس نہ خرید سکے، مریم نواز نے اس وقت کہا تھا کہ میری لندن تو کیا پاکستان میں بھی کوئی جائیداد نہیں، انہوں نے کیلبری فونٹ کی جعلی دستاویزات پیش کیں۔ وفاقی وزیر اطلاعات نے کہا کہ ان فلیٹوں کی تحقیقات میں یہ پارلیمان، سپریم کورٹ، عوام، میڈیا، ٹرائل کورٹ میں ایک درست ثبوت بھی نہیں پیش کر سکے، عدالتوں نے انہیں کئی مواقع دیئے لیکن ان کے پاس ثبوت ہوتے تو یہ پیش کرتے، اسی دوران عمران خان نے 40 سال پرانی رسیدیں عدالت میں پیش کیں۔ انہوں نے کہا کہ نیب آرڈیننس کے سیکشن 9 میں درج ہے کہ اگر کوئی اپنی جائیداد ثابت نہ کر سکے تو یہ کرپٹ پریکٹس ہے۔ چوہدری فواد حسین نے کہا کہ نواز شریف اور آصف علی زرداری کی کرپشن کا بچے بچے کو پتہ ہے۔ وفاقی وزیر اطلاعات نے کہا کہ الیکٹرانک ووٹنگ مشین اور اوورسیز پاکستانیوں کو ووٹنگ کا حق دینے کے حوالے سے قانون موجود ہے، الیکشن کمیشن الیکٹرانک ووٹنگ مشین کے ذریعے شفاف انتخابات کیلئے اپنی ذمہ داری ادا کرے۔ وفاقی وزیر اطلاعات نے کہا کہ وزیراعظم نے وزیر داخلہ کو پاسپورٹ بنانے سے متعلق معاملات کو آسان بنانے کی ہدایت کی ہے تاکہ اوورسیز پاکستانیوں کو ووٹنگ کے حوالے سے مسائل پیش نہ آئیں۔ انہوں نے کہا کہ آئی ایم ایف کا پروگرام منظور ہو گیا ہے، پاکستانی معیشت کو استحکام ملا ہے، اچھی خبریں بھی آ رہی ہیں، پارلیمان نے ای وی ایم اور اوورسیز پاکستانیوں کو ووٹنگ کا حق دینے کے حوالے سے بل بھی منظور کرلئے ہیں۔ وفاقی وزیر اطلاعات نے کہا کہ اپوزیشن عدلیہ اور فوج کے خلاف مہم بند کرے، ہمارے آئین میں ان دونوں اداروں کو تحفظ اور احترام حاصل ہے، اپوزیشن اپنے سوشل میڈیا اور کبھی اپنے لیڈران کے ذریعے دونوں اداروں کو نشانے پر رکھے ہوئے ہے جو غیر مناسب ہے۔ ایک سوال کے جواب میں وفاقی وزیر اطلاعات نے کہا کہ وفاقی وزیر اقتصادی امور عمر ایوب نے میریٹ ہوٹل اسلام آباد میں مریم نواز کے پروگرام کی فنڈنگ کے بارے میں اسٹیٹ بینک کو خط لکھا ہے، جس طریقے سے اس پروگرام کی فنڈنگ ہوئی اس پر جامع تحقیقات شروع کر دی گئی ہیں، ایف آئی اے بھی اپنی رپورٹ بنائے گی، قانون کے مطابق اس پر کارروائی ہوگی۔