پرائس کنٹرول میکنزم پر مؤثر عملدرآمد کو یقینی بایا جائے،ڈپٹی کمشنر لودھراں
لودھراں ( فہیم شہزاد سے ) ڈپٹی کمشنر آغا ظہیر عباس شیرازی کی زیر صدارت ضلعی پرائس کنٹرول کمیٹی کا اجلاس اُن کے دفتر کے کمیٹی روم میں منعقد ہوا۔اجلاس میں پولٹری، سبزیوں اور کھاد کی مقررہ نرخوں پر فروخت اور اشیاء خوردونوش کی قیمتوں میں استحکام کے لئے اٹھائے جانے والے اقدامات کا جائزہ لیا گیا۔ ڈپٹی کمشنر آغا ظہیر عباس شیرازی نے اجلاس سے خطاب میں کہا کہ پرائس کنٹرول کمیٹی کے روزانہ کی بنیاد پر منعقدہ اجلاس کا مقصد پرائس کنٹرول میکنزم پر مؤثر عملدرآمد کو یقینی بنانا ہے۔ انہوں نے مزید کہا کہ نرخ ناموں کو نمایاں جگہوں پر آویزاں کروائے جائیں۔ انہوں نے کہا کہ نرخ نامے آویزاں نہ کرنے والوں کو بھی جرمانے عائد کیے جائیں ۔ ڈپٹی کمشنر نے کہا کہ ضلع میں پرائس کنٹرول میکنزم پر حکومتی ہدایات کے مطابق عملدرآمد یقینی بنایا جائے۔انہوں نے کہا کہ مارکیٹوں اور بازاروں میں پرائس لسٹ کی موجودگی کے ساتھ صارفین کو کنٹرول قیمت پر اشیاء کی بلا تعطل دستیابی ممکن بنائی جائے۔ ڈپٹی کمشنر آغا ظہیر عباس شیرازی نے کہا کہ پرائس کنٹرول کمیٹی کے مقرر کردہ نرخوں پر عمل درآمد کو یقینی بنا کر عوام کو سستی اشیاء کی فراہمی کو ہر صورت ممکن بنایا جا رہا ہے۔انہوں نے پرائس کنٹرول مجسٹریٹس کو تمام اشیائے ضروریہ کی کوالٹی اور مارکیٹ میں دستیابی کو یقینی بنانے کی ہدایت کی۔ڈپٹی کمشنر نے کہا کہ تاجر برادی ضلع کی عوام کو ریلیف کی فراہمی میں اپنا بھرپور کردار ادا کریں۔ اجلاس میں ضلع بھر میں سبسڈائزڈ آٹے کی دستیابی، گھی، سبزیوں اور پھلوں سمیت دیگر اشیاء خوردونوش کی قیمتوں اور پولٹری ریٹ کا جائزہ لیا گیا۔ اجلاس میں ڈپٹی ڈائریکٹر زراعت توسیع محمد ظفر ملک، ڈپٹی ڈائریکٹر انفارمیشن نعمان مسعود خان، ڈسٹرکٹ آفیسر انڈسٹری عبدالرؤف، ڈسٹرکٹ فوڈ کنٹرولر ظہیر میو سمیت دیگر افسران شریک تھے۔