یورپی یونین اور دنیا کو افغانستان کے استحکام کے لئے اپنا کردار ادا کرنا ہوگا، وفاقی وزیر اطلاعات کی بلغاریہ کی سفیر ارینا گانچیوا سے گفتگو

اسلام آباد۔ (واصب ابراہیم غوری سے):وفاقی وزیر اطلاعات و نشریات چوہدری فواد حسین نے کہا ہے کہ یورپی یونین اور دنیا کو افغانستان کے استحکام کے لئے اپنا کردار ادا کرنا ہوگا، افغانستان کی موجودہ صورتحال کسی المیہ سے کم نہیں، افغانستان کے بارے میں اکانومسٹ کی حالیہ رپورٹ پریشان کن ہے، افغانستان میں 23 ملین افراد خوراک کی کمی کا شکار ہیں، بچے بھوک سے ہلاک ہو رہے ہیں، ہم نے دنیا کو افغانستان کے حوالے سے اپنی تشویش سے آگاہ کیا ہے، افغانستان کے عوام کی مدد کے لئے پوری دنیا کو آگے آنا چاہئے۔ یہ بات انہوں نے جمعرات کو یہاں پاکستان میں بلغاریہ کی سفیر ارینا گانچیوا سے ملاقات کے دوران گفتگو کرتے ہوئے کہی۔

وفاقی وزیر اطلاعات نے کہا کہ پاکستان افغانستان میں امن اور استحکام چاہتا ہے، افغانستان میں استحکام نہ ہوا تو عالمی دہشت گرد تنظیمیں افغانستان میں اپنے مراکز قائم کر سکتی ہیں۔ انہوں نے کہا کہ پاکستان نے دنیا سے افغانستان کے عوام کی مدد کی اپیل کی ہے۔

بلغاریہ افغانستان کی صورتحال میں اہم کردار ادا کر سکتا ہے۔ چوہدری فواد حسین نے کہا کہ ہم طالبان حکومت کو اس وقت تک تسلیم نہیں کریں گے جب تک خطے کے دیگر ممالک افغان حکومت کو تسلیم نہیں کرلیتے۔ بلغاریہ کے ساتھ پاکستان کے تعلقات کا ذکر کرتے ہوئے انہوں نے کہا کہ دونوں ممالک کے درمیان کئی دہائیوں پر مبنی سفارتی اور برادرانہ تعلقات قائم ہیں جسے ہم قدر کی نگاہ سے دیکھتے ہیں۔

اس موقع پر بلغاریہ کی سفیر نے افغانستان سے غیر ملکی شہریوں اور سفارت کاروں کے انخلاءکے حوالے سے پاکستان کی کوششوں کو سراہا۔ انہوں نے کہا کہ پاکستان کا افغان امن عمل میں کردار لائق تحسین ہے، بلغاریہ افغانستان میں امن کی کوششوں میں اپنا کردار ادا کرے گا۔