شہباز شریف اب عوام کو بیوقوف بنانا چھوڑدیں، خرم شیر زمان

خرم شیر زمان نے کہا ہے کہ شہباز شریف اب عوام کو بیوقوف بنانا چھوڑ دیں۔

وزیراعظم شہباز شریف کے بیان پر پی ٹی آئی کے پارلیمانی لیڈر سندھ اسمبلی خرم شیر زمان نے ردعمل دیتے ہوئے کہا ہے کہ چیری بلاسم کی مکمل گفتگو میں صرف منافقت کے سوا کچھ نہیں تھا۔

انہوں نے کہا کہ ڈالر کی قیمت 212 ہوگئی کیا یہ ذمہ داری بھی عمران خان کی ہے؟ چیری بلاسم دل پر پتھر رکھ کر مہنگائی کے بجائے لوٹی دولت واپس لائیں، دل پر پتھر رکھ کر مریم نواز کے سرکاری پروٹوکول پر خرچ کیا جارہا ہے۔

خرم شیر زمان نے کہا ہے کہ دل پر پتھر رکھ کر شوباز کے سوئمنگ پول اور اشتہارات پر کروڑوں خرچ کیے جارہے ہیں، دل پر پتھر رکھ کر مفتاح اسماعیل کے گھر پر لاکھوں خرچ کیے گئے۔

پی ٹی آئی کے پارلیمانی لیڈر سندھ اسمبلی نے کہا کہ اپوزیشن میں بیٹھ کر عمران خان کو آئی ایم ایف خان کہا گیا، اب فرماتے ہیں عمران خان نے آئی ایم ایف کے معاہدے پر عملدرآمد نہیں کیا۔

انہوں نے کہا کہ کیا عدم اعتماد لانے کا مشورہ پی ڈی ایم کو عمران خان نے دیا تھا، شہباز شریف اب عوام کو بیوقوف بنانا چھوڑدیں، شہباز شریف کی ٹیم اور تجربے سے پاکستانی عوام خوفزدہ ہوگئے ہیں، امپورٹڈ حکومت کیلئے بہتر ہے استعفیٰ دیں گھر جائیں۔