آرمی چیف جنرل قمر جاوید باجوہ سے کینیڈا کی نائب وزیر خارجہ مارٹا مورگن کی ملاقات
راولپنڈی: (ثاقب ابراہیم غوری سے ) آرمی چیف جنرل قمر جاوید باجوہ سے کینیڈا کی نائب وزیر خارجہ مارٹا مورگن نے ملاقات کی۔ ملاقات میں باہمی دلچسپی کے امور، مختلف شعبوں میں دوطرفہ تعاون، مجموعی علاقائی صورتحال اور افغانستان میں انسانی ہمدردی کی بنیاد پر اقدامات میں تعاون پر تبادلہ خیال کیا گیا۔
پاک فوج کے شعبہ تعلقات عامہ کے مطابق اس موقع پر آرمی چیف نے کہا کہ پاکستان کینیڈا کے ساتھ دوطرفہ روابط کی روایت کو برقرار رکھنے اور طویل المدتی اور کثیر المقاصد پائیدار تعلقات کا خواہاں ہے۔ انہوں نے انسانی بحران سے بچنے کے لیے افغانستان کے معاملے پر عالمی اتحاد کی اشد ضرورت کا اعادہ کیا۔
کینیڈا کی نائب وزیر خارجہ نے افغانستان سے انخلاء کے آپریشن اور علاقائی استحکام میں پاکستان کے کردار کو سراہا اور پاکستان کے ساتھ ہر سطح پر سفارتی تعاون میں مزید بہتری کے لیے اپنا کردار ادا کرنے کا عزم ظاہر کیا۔
