شان مسعود کی کاؤنٹی کرکٹ میں لگاتار دوسری ڈبل سنچری
قومی کرکٹ ٹیم کے سلامی بیٹر شان مسعود کاؤنٹی کرکٹ میں لگاتار دوسری ڈبل سنچری اسکور کرنے والے دوسرے پاکستانی بیٹر بن گئے۔
کرک انفو کی رپورٹ کے مطابق شان مسعود نے ڈربی شائر کی نمائندگی کرتے ہوئے لیئسٹاشائر کے خلاف 219 رنز کی شاندار اننگز کھیلی۔
ان کی اننگز میں 26 چوکے، اور ایک چھکا شامل ہے۔ شان مسعود اب تک کاونٹی کرکٹ میں 152.75 کی اوسط سے 611 رنز بنا چکے ہیں۔
وہ دوسرے پاکستانی بیٹر ہیں جنہوں نے کاونٹی کرکٹ کے سیزن میں دو ڈبل سنچریاں اسکور کی ہیں
دوسری جانب قومی کرکٹ ٹیم کے فاسٹ بولر حسن علی نے کاونٹی کرکٹ میں چھ وکٹیں لے کر ٹیسٹ کرکٹ میں سب سے زیادہ وکٹیں لینے والے فاسٹ بولر جیمز اینڈرسن کو بھی اپنا گرویدہ کر لیا۔
27 سالہ حسن علی نے لنکاشائر کی نمائندگی کرتے ہوئے گلوسٹاشائیر کے خلاف عمدہ بولنگ کا مظاہرہ کیا، انہوں نے 17 اوورز میں 47 رنز دے کر 6 کھلاڑیوں کو پولین کی راہ دکھائی۔
حسن علی کی عمدہ بولنگ کے باعث گلوسٹاشائیر کی ٹیم 252 رنز بنا کر آؤٹ ہو گئی۔
