افغان سرزمین سے پاکستان میں دہشت گردی نہیں ہونے دیں گے، فیلڈ مارشل عاصم منیر کا دوٹوک اعلان

یوتھ ویژن نیوز : (واصب ابراہیم غوری سے) پاک فوج کے سربراہ فیلڈ مارشل عاصم منیر نے کہا ہے کہ افغان سرزمین کو پاکستان کے خلاف استعمال نہیں ہونے دیا جائے گا اور دہشت گردی کے خاتمے کے لیے ہر ممکن قدم اٹھایا جائے گا۔ انہوں نے واضح کیا کہ پاکستان افغانستان سمیت تمام ہمسایہ ممالک کے ساتھ امن چاہتا ہے، تاہم قومی سلامتی پر کوئی سمجھوتہ نہیں کیا جائے گا۔ پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے پشاور کا دورہ کیا، جہاں انہوں نے قبائلی عمائدین کے ایک جرگے سے ملاقات کی اور صوبہ خیبر پختونخوا میں سیکیورٹی صورتحال، انسداد دہشت گردی کی کوششوں اور پاک–افغان سرحد پر استحکام سے متعلق تفصیلی بریفنگ حاصل کی۔

ہیڈکوارٹر 11 کور میں اجلاس کے دوران فیلڈ مارشل کو دہشت گردی کے خلاف جاری آپریشنز، پاک–افغان سرحد پر تازہ پیش رفت اور مقامی فورسز کے کردار کے حوالے سے آگاہ کیا گیا۔ انہوں نے خیبر پختونخوا کے عوام، خصوصاً قبائلی اضلاع کے لوگوں کی قربانیوں کو خراجِ تحسین پیش کرتے ہوئے کہا کہ پاکستان کے بہادر عوام اور سیکیورٹی فورسز نے دہشت گردی کے خلاف عظیم جدوجہد کی ہے اور ان کی قربانیاں ملک کی سلامتی کی بنیاد ہیں۔

مزید یہ بھی پڑھیں: فیلڈ مارشل جنرل عاصم منیر کی قیادت میں پاک فوج نے افغان اشتعال انگیزی کا بھرپور جواب دیا، وزیرِ اعظم شہباز شریف

آئی ایس پی آر کے مطابق فیلڈ مارشل نے اس بات پر زور دیا کہ افغانستان کی سرزمین سے ہونے والی دہشت گرد کارروائیوں پر پاکستان کو شدید تشویش ہے، کیونکہ بارہا یقین دہانیوں کے باوجود سرحد پار حملے جاری ہیں۔ انہوں نے کہا کہ گزشتہ چند برسوں میں پاکستان نے غیر معمولی صبر و تحمل کا مظاہرہ کیا ہے اور افغانستان کے ساتھ سفارتی اور اقتصادی تعاون کو بڑھانے کی متعدد کوششیں کیں تاکہ دونوں ممالک کے تعلقات بہتر ہوں۔ تاہم، انہوں نے خبردار کیا کہ اگر دہشت گرد گروہوں کو افغان سرزمین پر مزید آزادی ملی تو پاکستان اپنے عوام کے تحفظ کے لیے فیصلہ کن اقدامات اٹھائے گا۔

فیلڈ مارشل عاصم منیر نے کہا کہ پاکستان کی خواہش ہمیشہ خطے میں امن و استحکام کی رہی ہے لیکن بدقسمتی سے بھارت کی حمایت یافتہ دہشت گرد تنظیمیں پاکستان کے خلاف سرگرم ہیں۔ انہوں نے کہا کہ "فتنہ الخوارج” اور "فتنہ الہندوستان” کے نام سے بھارتی اسپانسرڈ پراکسیز کو افغان سرزمین پر جگہ دی جا رہی ہے، اور طالبان حکومت ان گروہوں کو عملی طور پر مدد فراہم کر رہی ہے جو خطے کے امن کے لیے خطرہ ہیں۔ فیلڈ مارشل نے باور کرایا کہ پاکستان اپنی سرزمین پر کسی بھی بیرونی مداخلت یا دہشت گردی کو برداشت نہیں کرے گا۔

جرگے کے موقع پر قبائلی عمائدین نے دہشت گردی کے خلاف پاک فوج کے کردار کو سراہا اور فیلڈ مارشل عاصم منیر کی قیادت پر مکمل اعتماد کا اظہار کیا۔ عمائدین نے اس بات پر اتفاق کیا کہ خیبر پختونخوا کے عوام دہشت گردی اور انتہا پسندی کو مسترد کر چکے ہیں اور امن و استحکام کے قیام میں سیکیورٹی فورسز کے شانہ بشانہ ہیں۔ عمائدین نے واضح کیا کہ "فتنہ الخوارج” کا نظریہ خیبر پختونخوا کے قبائل میں کوئی جگہ نہیں رکھتا اور وہ پاکستان کی سالمیت کے لیے اپنی قربانیاں جاری رکھیں گے۔

فیلڈ مارشل نے قبائلی رہنماؤں کو یقین دلایا کہ پاکستان خصوصاً خیبر پختونخوا کو دہشت گردوں اور ان کے سہولت کاروں سے مکمل طور پر پاک کر دیا جائے گا۔ انہوں نے کہا کہ پاک فوج دہشت گردی کے مکمل خاتمے کے لیے ریاستی اداروں، قانون نافذ کرنے والے اداروں اور عوام کے ساتھ مل کر مربوط کارروائیاں جاری رکھے ہوئے ہے۔

آئی ایس پی آر کے بیان کے مطابق فیلڈ مارشل نے کہا کہ پاک–افغان تعلقات کو بہتر بنانے کے لیے پاکستان نے ہمیشہ مثبت اقدامات کیے ہیں، لیکن اس کے بدلے سرحد پار دہشت گردی کا تسلسل ناقابلِ قبول ہے۔ انہوں نے کہا کہ "افغانستان کی قیادت کو اس حقیقت کا ادراک ہونا چاہیے کہ دہشت گردی کسی کے مفاد میں نہیں۔ پاکستان ایک پرامن ہمسائیگی کی پالیسی پر یقین رکھتا ہے لیکن اپنے شہریوں کے تحفظ پر سمجھوتہ نہیں کرے گا۔”

فیلڈ مارشل کے پشاور دورے کے دوران کور کمانڈر پشاور نے ان کا استقبال کیا۔ انہوں نے سیکیورٹی فورسز کی آپریشنل تیاریوں کو سراہتے ہوئے کہا کہ پاک فوج کی قربانیاں خطے کے امن کی ضمانت ہیں۔ آئی ایس پی آر کے مطابق فیلڈ مارشل نے دہشت گردی کے خلاف جنگ میں جانیں قربان کرنے والے افسران اور جوانوں کو خراج عقیدت پیش کیا۔

تجزیہ کاروں کے مطابق فیلڈ مارشل عاصم منیر کا یہ دوٹوک بیان پاکستان کی سلامتی پالیسی کی وضاحت کرتا ہے اور افغانستان کے ساتھ بڑھتی کشیدگی کے تناظر میں ایک واضح پیغام ہے کہ پاکستان اب مزید سرحد پار دہشت گردی برداشت نہیں کرے گا۔