فیلڈ مارشل عاصم منیر کی قاہرہ میں مصری صدر السیسی سے ملاقات ، دوطرفہ تعلقات کے نئے دور کا آغاز

یوتھ ویژن نیوز: (ثاقب ابراہیم سے) پاک فوج کے سربراہ فیلڈ مارشل سید عاصم منیر نے اپنے دورۂ مصر کے دوران قاہرہ کے اتحادیہ محل میں مصری صدر عبدالفتح السیسی سے اہم ملاقات کی، جس میں پاکستان اور مصر کے درمیان دوطرفہ تعلقات، علاقائی استحکام، اور مسلم اُمہ کے باہمی تعاون سے متعلق امور پر تفصیلی تبادلۂ خیال کیا گیا۔

آئی ایس پی آر کے مطابق ملاقات کے دوران دونوں رہنماؤں نے اس عزم کا اظہار کیا کہ پاکستان اور مصر کے درمیان تاریخی اور برادرانہ تعلقات کو مزید مضبوط بنیادوں پر استوار کیا جائے گا۔ فیلڈ مارشل عاصم منیر نے مصری قیادت کے خطے میں امن، برداشت اور استحکام کے لیے کردار کو سراہا اور کہا کہ قاہرہ کا متوازن نقطہ نظر مشرق وسطیٰ سمیت اسلامی دنیا میں امن کے فروغ میں اہم کردار ادا کر رہا ہے۔

مزید یہ بھی پڑھیں: فیلڈ مارشل جنرل عاصم منیر کی قیادت میں پاک فوج نے افغان اشتعال انگیزی کا بھرپور جواب دیا، وزیرِ اعظم شہباز شریف

ملاقات میں باہمی دلچسپی کے متعدد امور زیرِ غور آئے جن میں دفاعی تعاون، انسدادِ دہشت گردی، انٹیلیجنس شراکت، اور اقتصادی شراکت داری کے امکانات شامل تھے۔ دونوں ممالک کے رہنماؤں نے اس بات پر اتفاق کیا کہ موجودہ عالمی صورتحال میں مسلم اُمہ کو اتحاد اور مشترکہ لائحہ عمل کی ضرورت ہے تاکہ مشترکہ چیلنجز کا مقابلہ مؤثر انداز میں کیا جا سکے۔ مصری صدر عبدالفتح السیسی نے پاکستان کے مثبت اور فعال کردار کو سراہتے ہوئے کہا کہ اسلام آباد نے ہمیشہ امتِ مسلمہ کے مفادات کے تحفظ اور عالمی امن کے قیام میں اہم کردار ادا کیا ہے۔

انہوں نے فیلڈ مارشل عاصم منیر کی قیادت میں پاکستان کے استحکام اور ترقی کے لیے جاری اقدامات کی بھی تعریف کی۔ ملاقات میں فریقین نے عوامی سطح پر روابط کو فروغ دینے، ثقافتی اور تعلیمی تبادلوں کو بڑھانے، اور تجارتی تعلقات کو وسعت دینے پر بھی زور دیا۔ فیلڈ مارشل عاصم منیر نے اس موقع پر کہا کہ پاکستان مصر کو مشرقِ وسطیٰ اور افریقہ میں ایک اہم اتحادی کے طور پر دیکھتا ہے اور دونوں ممالک کے درمیان تعاون نہ صرف خطے کے امن بلکہ عالمی توازن کے لیے بھی ناگزیر ہے۔ انہوں نے مصری صدر کو یقین دلایا کہ پاکستان خطے میں امن، استحکام اور ترقی کے فروغ کے لیے مصر کے ساتھ ہر سطح پر تعاون جاری رکھے گا۔ ملاقات کے دوران دونوں رہنماؤں نے اس بات پر اتفاق کیا کہ دفاعی شراکت داری کو انسدادِ دہشت گردی کی مشترکہ کوششوں تک وسعت دی جائے، اور دونوں ممالک کے افواج کے درمیان تربیتی و تکنیکی تبادلوں کو مزید مؤثر بنایا جائے۔

آئی ایس پی آر کے مطابق فیلڈ مارشل عاصم منیر نے مصری صدر کو پاکستانی عوام اور حکومت کی جانب سے نیک خواہشات بھی پہنچائیں۔ اس موقع پر صدر السیسی نے کہا کہ پاکستان اور مصر کی دوستی تاریخی بنیادوں پر قائم ہے اور وقت کے ساتھ یہ تعلق مزید مستحکم ہوا ہے۔ انہوں نے کہا کہ دونوں ممالک کے درمیان تعاون سے خطے میں امن، ترقی اور خوشحالی کے نئے دروازے کھلیں گے۔ ملاقات کے اختتام پر دونوں رہنماؤں نے باہمی سٹریٹجک مفادات میں ہم آہنگی اور مشترکہ لائحہ عمل کے تسلسل پر اتفاق کیا۔ فیلڈ مارشل عاصم منیر کا یہ دورہ مصر اس بات کا ثبوت ہے کہ پاکستان عالمی سطح پر اپنے دوست ممالک کے ساتھ تعلقات کو نئی بلندیوں تک لے جانے کے لیے فعال سفارتکاری اور دفاعی روابط کو فروغ دے رہا ہے۔