رکن صوبائی اسمبلی سعدیہ بلال کا فشریز ڈیپارٹمنٹ بہاول پور کا دورہ ! ماہی پروری دیہی معیشت کی ریڑھ کی ہڈی قرار

یوتھ ویژن نیوز: (نمائدہ خصوصی امجد محمود بھٹی بہاول پور سے) : رکن صوبائی اسمبلی اور ممبر اسٹینڈنگ کمیٹی برائے وائلڈ لائف سعدیہ بلال نے فشریز ڈیپارٹمنٹ بہاول پور کا دورہ کیا جہاں انہیں محکمے کی حالیہ کارکردگی، جاری منصوبوں، جدید ٹیکنالوجی کے استعمال اور مچھلیوں کی افزائش کے مختلف پروگرامز پر تفصیلی بریفنگ دی گئی۔

اس موقع پر سعدیہ بلال نے کہا کہ دیہی معیشت کی مضبوطی کے لیے ماہی پروری کا شعبہ ریڑھ کی ہڈی کی حیثیت رکھتا ہے کیونکہ یہ نہ صرف مقامی سطح پر روزگار کے مواقع فراہم کرتا ہے بلکہ ملکی معیشت میں بھی نمایاں کردار ادا کرتا ہے۔ انہوں نے مزید کہا کہ پاکستان میں فش فارمنگ کو فروغ دے کر دیہی علاقوں میں غربت کے خاتمے، غذائی تحفظ اور برآمدات میں اضافہ کیا جا سکتا ہے۔

سعدیہ بلال نے فشریز ڈیپارٹمنٹ کے مختلف منصوبوں کا معائنہ کیا، مقامی اسٹاف سے گفتگو کی اور ان کے مسائل سنے۔ ان کا کہنا تھا کہ محکمہ فشریز کے پاس وہ تمام صلاحیتیں موجود ہیں جن کے ذریعے اس صنعت کو عالمی معیار تک پہنچایا جا سکتا ہے۔ انہوں نے زور دیا کہ جدید ماہی پروری کے طریقوں کو اپناتے ہوئے مقامی کسانوں اور ماہی گیروں کو تربیت دی جائے تاکہ وہ کم وسائل میں زیادہ پیداوار حاصل کر سکیں۔ سعدیہ بلال نے کہا کہ ماہی پروری کا شعبہ پنجاب کے دیہی علاقوں کے لیے نہایت اہم ہے کیونکہ یہ زراعت کے بعد دوسرا بڑا ذریعہ آمدن بن سکتا ہے۔ انہوں نے محکمے کے افسران کو ہدایت دی کہ وہ شفافیت، جدت اور پائیداری کے اصولوں کو مدنظر رکھتے ہوئے منصوبوں پر عملدرآمد کریں تاکہ عوام براہ راست ان کے ثمرات سے مستفید ہو سکیں۔ ان کا کہنا تھا کہ ماہی پروری کے فروغ سے نہ صرف غذائی قلت پر قابو پایا جا سکے گا بلکہ نوجوانوں کو روزگار کے نئے مواقع بھی حاصل ہوں گے، جو کہ حکومت کی پالیسیوں کے عین مطابق ہے۔ سعدیہ بلال نے مزید کہا کہ قدرتی وسائل کے بہتر استعمال، آبی ذخائر کی حفاظت اور ماحولیاتی توازن برقرار رکھنے کے لیے محکمہ فشریز کو جدید سائنسی تحقیق سے استفادہ کرنا چاہیے۔ انہوں نے افسران کی کارکردگی کو سراہا اور امید ظاہر کی کہ محکمہ اپنی پیشہ ورانہ مہارت اور محنت سے صوبے کی معیشت میں مثبت کردار ادا کرتا رہے گا۔ اس موقع پر مسلم لیگ (ن) لائرز فورم کے سینئر نائب صدر بلال ملک بھی ان کے ہمراہ تھے جنہوں نے کہا کہ سعدیہ بلال جیسے عوام دوست نمائندے صوبے میں ترقی اور فلاح کے حقیقی سفیر ہیں۔ ملاقات کے دوران فشریز کے افسران نے بتایا کہ بہاول پور میں ماہی پروری کے فروغ کے لیے کئی نئے پائلٹ منصوبے شروع کیے جا چکے ہیں جن میں جدید تالاب سازی، فیڈ منیجمنٹ اور مچھلیوں کی افزائش نسل کے تربیتی کورسز شامل ہیں۔ سعدیہ بلال نے امید ظاہر کی کہ اگر انہی خطوط پر کام جاری رہا تو فشریز کا شعبہ نہ صرف پنجاب بلکہ پورے پاکستان کے لیے ایک کامیاب ماڈل بن جائے گا۔