طاہر اندرابی وزارتِ خارجہ کے نئے ترجمان مقرر، شفقت علی خان کو یو اے ای میں سفیر تعینات کیا گیا

یوتھ ویژن نیوز : (مس کنول فرید سے) وزارتِ خارجہ میں اہم تبدیلی عمل میں آئی ہے، جس کے تحت طاہر اندرابی کو نیا ترجمان مقرر کر دیا گیا ہے۔ نجی ٹی وی نیوز کے مطابق وزارتِ خارجہ کے ذرائع نے تصدیق کی ہے کہ طاہر اندرابی گریڈ 21 کے سینئر افسر ہیں جو اس وقت تخفیفِ اسلحہ کے شعبے کے نگران کے طور پر خدمات انجام دے رہے ہیں۔ وہ اس سے قبل تیونس میں پاکستان کے سفیر اور جنیوا میں پاکستان کے قائم مقام مستقل مندوب کے طور پر بھی خدمات سرانجام دے چکے ہیں۔

ذرائع کے مطابق موجودہ ترجمان شفقت علی خان کو متحدہ عرب امارات (یو اے ای) میں پاکستان کا نیا سفیر تعینات کیا جا رہا ہے، اور جلد اس حوالے سے باضابطہ نوٹیفکیشن جاری ہونے کا امکان ہے۔

طاہر اندرابی کو وزارتِ خارجہ کے پالیسی اور سفارتی معاملات میں وسیع تجربہ حاصل ہے۔ ان کی تعیناتی کو ایک ایسے وقت میں اہم قرار دیا جا رہا ہے جب پاکستان علاقائی اور عالمی سطح پر سفارتی سرگرمیوں کو ازسرِ نو متحرک کر رہا ہے۔ ان کی قیادت میں وزارتِ خارجہ کی ترجمانی کے شعبے میں مؤثر رابطہ کاری اور بین الاقوامی سطح پر پاکستان کے مؤقف کو مزید مضبوط انداز میں اجاگر کرنے کی توقع کی جا رہی ہے۔

سفارتی ذرائع کے مطابق طاہر اندرابی کی بطور ترجمان تعیناتی وزارتِ خارجہ کے میڈیا و پبلک ڈپلومیسی ونگ میں ایک نئی پیشرفت ہے، جس سے نہ صرف وزارت کی پالیسی مواصلات میں شفافیت بڑھے گی بلکہ عالمی میڈیا میں پاکستان کی شبیہ کو بہتر انداز میں پیش کرنے میں بھی مدد ملے گی۔