وفاقی کابینہ کی سی سی ایل سی اجلاسوں کے فیصلوں کی توثیق، شرم الشیخ میں وزیراعظم کے خطاب کو زبردست خراجِ تحسین
یوتھ ویژن نیوز : (عمران قذافی سے) وزیراعظم محمد شہباز شریف کی زیرِ صدارت وفاقی کابینہ کا اجلاس وزیراعظم ہاؤس میں منعقد ہوا، جس میں کابینہ کمیٹی برائے قانون سازی (CCLC) کے مختلف اجلاسوں میں کیے گئے فیصلوں کی توثیق کی گئی۔ اجلاس کے دوران کابینہ کے اراکین نے شرم الشیخ، مصر میں ہونے والے غزہ امن سربراہی اجلاس میں وزیراعظم کے تاریخی خطاب کو سراہا اور انہیں غزہ امن معاہدے میں پاکستان کے مؤثر کردار پر زبردست خراجِ تحسین پیش کیا۔ اراکین نے ڈیسک بجا کر وزیراعظم کو داد دی اور کہا کہ ان کی قیادت نے عالمی سطح پر پاکستان کا وقار بلند کیا ہے۔
وزیراعظم شہباز شریف نے کابینہ کے اراکین کا شکریہ ادا کرتے ہوئے کہا کہ شرم الشیخ میں پاکستان نے عالمی سطح پر عزت و احترام حاصل کیا ہے۔ انہوں نے کہا کہ اللہ تعالیٰ کے فضل و کرم سے پاکستان کو غزہ امن معاہدے میں انتہائی اہم اور مثبت کردار ادا کرنے کا موقع ملا، جس کے بعد دنیا نے پاکستان کو ایک مؤثر اور ذمہ دار ملک کے طور پر تسلیم کیا۔ وزیراعظم نے کہا کہ ’’ہم اللہ تعالیٰ کے بے حد شکر گزار ہیں کہ اس نے پاکستان کو دنیا بھر میں عزت و تکریم سے نوازا۔‘‘
مزید پڑھیں : وزیراعظم شہباز شریف کی جانب سے سپریم کورٹ بار الیکشن میں کامیابی پر انڈیپینڈنٹ گروپ کو مبارکباد
اجلاس میں کابینہ کمیٹی برائے قانون سازی (CCLC) کے 23 ستمبر 2025 کے اجلاس میں کیے گئے فیصلوں کی توثیق کی گئی۔ ان فیصلوں کے تحت ٹریڈ آرگنائزیشن رولز 2013 کے شیڈول ای (E) میں ترامیم کی منظوری دی گئی، جن کے مطابق پاکستان بھر میں خواتین چیمبرز آف کامرس اینڈ انڈسٹری کے لائسنس گرانٹ اور تجدید فیس میں کوئی اضافہ نہیں کیا جائے گا۔
اس کے علاوہ انٹر بورڈ کوآرڈینیشن کمیشن ایکٹ 2023 میں ترامیم کی بھی توثیق کی گئی، جن کے مطابق ملک بھر کے تعلیمی بورڈز میں خواتین کی 33 فیصد نمائندگی کو یقینی بنایا جائے گا۔ کابینہ نے مزید جموں و کشمیر (ایڈمنسٹریشن آف پراپرٹی) آرڈیننس 1961، کراچی پورٹ ٹرسٹ ایکٹ 1986، گوادر پورٹ اتھارٹی آرڈیننس 2002 اور پورٹ قاسم ایکٹ 1973 میں ترامیم کی بھی منظوری دی، تاکہ یہ تمام قوانین اسٹیٹ اونڈ انٹرپرائزز (SOEs) ایکٹ 2023 سے ہم آہنگ ہو سکیں۔
وفاقی کابینہ نے 8 اکتوبر 2025 کے سی سی ایل سی اجلاس کے فیصلوں کی توثیق بھی کر دی، جن کے تحت پاکستان ڈیجیٹل اتھارٹی (مینجمنٹ اینڈ یوٹیلائزیشن آف ڈیجیٹل نیشن فنڈ) رولز 2025 کی منظوری دی گئی۔ اس کے علاوہ ادارہ شماریات پاکستان کی گورننگ کونسل میں ترامیم بھی منظور کی گئیں۔
مزید برآں، کابینہ نے 10 اکتوبر 2025 کے سی سی ایل سی اجلاس کے فیصلوں کی توثیق کرتے ہوئے آرمڈ فورسز نرسنگ سروسز رولز 1969 میں ترامیم کی منظوری دی۔ اس کے ساتھ ساتھ سول ان مینڈ (Civil Unmanned) ایئر کرافٹ رولز 2025 اور پاسپورٹ امینڈمنٹ رولز 2021 میں ترامیم بھی منظور کر لی گئیں۔
سیاسی مبصرین کے مطابق وزیراعظم کے شرم الشیخ خطاب نے پاکستان کے مؤقف کو عالمی سطح پر اجاگر کیا، جبکہ کابینہ کے حالیہ فیصلے ملک میں قانون سازی، خواتین کی نمائندگی اور ڈیجیٹل اصلاحات کے فروغ کی سمت اہم قدم ثابت ہوں گے۔
