ایف بی آر کا بڑا فیصلہ! انکم ٹیکس گوشوارے جمع کرانے کی تاریخ میں 15 روزہ توسیع، اب نیا ڈیڈ لائن 31 اکتوبر مقرر
یوتھ ویژن نیوز : ( عمران قذافی سے) فیڈرل بورڈ آف ریونیو (ایف بی آر) نے تاجروں، صنعت کاروں اور مختلف سیاسی و کاروباری تنظیموں کے مطالبات پر انکم ٹیکس گوشوارے جمع کرانے کی تاریخ میں 15 روز کی مزید توسیع کر دی ہے۔
جس کے بعد اب ٹیکس ریٹرن فائل کرنے کی آخری تاریخ 31 اکتوبر مقرر کی گئی ہے۔ ایف بی آر کے اعلامیے کے مطابق اس فیصلے کا مقصد زیادہ سے زیادہ ٹیکس دہندگان کو ریٹرن فائلنگ کے عمل میں شامل کرنا اور کاروباری طبقے کو سہولت فراہم کرنا ہے تاکہ وہ اپنے مالی امور کو بروقت مکمل کر سکیں۔ اس سے قبل انکم ٹیکس گوشوارے جمع کرانے کی آخری تاریخ 30 ستمبر مقرر تھی، جسے پہلے مرحلے میں 15 اکتوبر تک بڑھایا گیا تھا۔
تاہم ملک بھر میں تاجروں، ٹیکس بار ایسوسی ایشنز اور سیاسی نمائندوں کی جانب سے بارہا مطالبہ کیا جا رہا تھا کہ موجودہ معاشی دباؤ اور مالیاتی مشکلات کے باعث ٹیکس گوشوارے جمع کرانے کے لیے مزید مہلت دی جائے۔ ایف بی آر کے ترجمان کے مطابق یہ فیصلہ اسی تناظر میں کیا گیا ہے تاکہ ٹیکس دہندگان کو اضافی وقت مل سکے۔ اعلامیے میں کہا گیا ہے کہ یہ توسیع آخری ہوگی اور مقررہ مدت کے بعد گوشوارے جمع نہ کرانے والے افراد کے خلاف قانونی کارروائی عمل میں لائی جائے گی۔
جو لوگ مقررہ تاریخ کے بعد ریٹرن جمع کرائیں گے انہیں لیٹ فائلر کیٹیگری میں شمار کیا جائے گا، جس کے نتیجے میں ان پر ودہولڈنگ ٹیکس کی شرح زیادہ لاگو ہوگی۔ ایف بی آر نے واضح کیا ہے کہ ریٹرن فائل کرنا ہر ٹیکس دہندہ کی قانونی اور قومی ذمہ داری ہے، اور حکومت معیشت کو دستاویزی بنانے کے لیے اس عمل کو تیز تر کرنے کے عزم پر قائم ہے۔ ایف بی آر حکام کے مطابق ملک میں ٹیکس نیٹ کو وسعت دینے کے لیے مختلف اقدامات کیے جا رہے ہیں، جن میں ڈیجیٹل فائلنگ، نادرا ڈیٹا انضمام اور ٹیکس دہندگان کے لیے آن لائن سہولتوں میں بہتری شامل ہے۔ ذرائع کے مطابق کراچی، لاہور، فیصل آباد اور پشاور سمیت کئی شہروں کی تاجر برادری نے ایف بی آر کے اس فیصلے کا خیرمقدم کیا ہے اور کہا ہے کہ یہ اقدام کاروباری طبقے کو ریلیف فراہم کرے گا۔
یاد رہے کہ کراچی میں متحدہ قومی موومنٹ (ایم کیو ایم) پاکستان کے رہنما ڈاکٹر فاروق ستار نے چند روز قبل حکومت سے اپیل کی تھی کہ سالانہ ٹیکس ریٹرن جمع کرانے کی تاریخ 15 اکتوبر سے بڑھا کر 30 نومبر کی جائے، کیونکہ غیر معمولی مون سون بارشوں اور معاشی مشکلات کی وجہ سے کاروباری طبقہ اپنے مالی معاملات بروقت مکمل نہیں کر سکا۔ فاروق ستار نے وزیراعظم، وزیر خزانہ اور چیئرمین ایف بی آر سے درخواست کی تھی کہ تاجروں کو مزید ریلیف فراہم کیا جائے تاکہ وہ اعتماد کے ساتھ ٹیکس فائلنگ کے عمل میں حصہ لے سکیں۔ ایف بی آر کے مطابق توسیع کا فیصلہ تاجروں اور ٹیکس بار ایسوسی ایشنز کے اتفاقِ رائے سے کیا گیا ہے۔ اس پیش رفت کے بعد ملک بھر میں لاکھوں ٹیکس دہندگان کو اپنے گوشوارے جمع کرانے کے لیے دو ہفتے کا اضافی وقت مل گیا ہے۔ ماہرین معاشیات کا کہنا ہے کہ اس فیصلے سے حکومت کو ریونیو ٹارگٹ حاصل کرنے میں مدد ملے گی اور فائلرز کی تعداد میں نمایاں اضافہ متوقع ہے۔ ایف بی آر نے شہریوں کو مشورہ دیا ہے کہ وہ آخری تاریخ کا انتظار کیے بغیر اپنے گوشوارے جمع کرائیں تاکہ کسی قسم کی تکنیکی یا قانونی پیچیدگی سے بچا جا سکے۔
