بہاولپور ڈویژن میں 26 لاکھ 83 ہزار ایکڑ پر گندم کاشت کا ہدف مقرر، کاشتکار 30 نومبر تک بجائی مکمل کریں، کمشنر مسرت جبیں

یوتھ ویژن نیوز : (خصوصی رپورٹ برائے حبیب الراحمن راجپوت محکمہ تعلقاتِ عامہ بہاولپور سے) بہاولپور ڈویژن میں 26 لاکھ 83 ہزار ایکڑ پر گندم کاشت کا ہدف مقرر، کاشتکار 30 نومبر تک بجائی مکمل کریں — کمشنر مسرت جبیں۔

بہاولپور ڈویژن میں رواں سال گندم کی شاندار پیداوار کے لیے حکومتِ پنجاب نے 26 لاکھ 83 ہزار ایکڑ رقبے پر گندم کی کاشت کا ہدف مقرر کیا ہے۔ کمشنر بہاولپور ڈویژن مسرت جبیں نے کہا ہے کہ وزیراعلیٰ پنجاب کی خصوصی ہدایات کے تحت گندم اگاؤ مہم 2025 کو کامیاب بنانا سب کی مشترکہ ذمہ داری ہے۔ انہوں نے زور دیا کہ تمام محکمے، بالخصوص محکمہ زراعت اور ریونیو ڈیپارٹمنٹ، فیلڈ میں متحرک کردار ادا کریں تاکہ کاشتکاروں کو گھر کی دہلیز پر رہنمائی اور معاونت میسر ہو سکے۔

پانی کی دستیابی اور کاشتکاروں کی سہولت

اجلاس میں محکمہ انہار کو ہدایت دی گئی کہ بغیر وارہ بندی کے پانی کی فراہمی کو ٹیل تک یقینی بنایا جائے تاکہ گندم کی بوائی میں کسی قسم کی رکاوٹ پیدا نہ ہو۔ مسرت جبیں نے کہا کہ حکومتِ پنجاب نے کاشتکاروں کے لیے تاریخی سہولیات متعارف کرائی ہیں، جن سے نہ صرف گندم کی پیداوار بڑھے گی بلکہ زرعی معیشت کو بھی استحکام حاصل ہوگا۔

کسانوں کے لیے خصوصی مراعات

انہوں نے بتایا کہ گندم کی خریداری کے لیے حکومتِ پنجاب اور پرائیویٹ سیکٹر کے درمیان معاہدہ طے پا گیا ہے، جس کے تحت گندم 3500 روپے فی من کے حساب سے خریدی جائے گی۔ مزید یہ کہ گندم کے تصدیق شدہ بیج کی قیمت بھی کم کر دی گئی ہے — جو پہلے 6500 روپے فی تھیلا تھی، اب 5500 روپے فی 50 کلو گرام کر دی گئی ہے۔

بلا سود قرض اور انعامی اسکیم

اجلاس کو بریفنگ دیتے ہوئے بتایا گیا کہ بہاولپور ڈویژن میں اب تک ایک لاکھ 13 ہزار کسان کارڈ جاری کیے جا چکے ہیں۔ کاشتکاروں کو تین لاکھ روپے تک کا بلاسود قرض فراہم کیا جائے گا تاکہ وہ بروقت بیج، کھاد اور دیگر مداخل خرید سکیں۔ حکومت پنجاب کی جانب سے زیادہ پیداوار حاصل کرنے والے کسانوں کے لیے کروڑوں روپے کے انعامات کا بھی اعلان کیا جائے گا، جس میں صوبائی اور ضلعی سطح پر انعامات تقسیم کیے جائیں گے۔ جدید ٹیکنالوجی اور بلیک مارکیٹنگ کے خلاف سخت اقدامات

کمشنر مسرت جبیں نے متعلقہ ٹیموں کو ہدایت دی کہ وہ کسانوں کو جدید زرعی ٹیکنالوجی سے روشناس کرائیں تاکہ گندم کی فی ایکڑ پیداوار میں اضافہ ہو۔ انہوں نے کہا کہ کھاد اور بیج کی قیمتوں اور معیار پر کڑی نظر رکھی جائے، جبکہ بلیک مارکیٹنگ یا ذخیرہ اندوزی میں ملوث عناصر کے خلاف زیرو ٹالرنس پالیسی اپنائی جائے۔

گندم کی بوائی کی آخری تاریخ

کمشنر نے واضح ہدایت دی کہ گندم کی کاشت 30 نومبر تک ہر صورت مکمل ہونی چاہیے۔ انہوں نے کہا کہ اگر کاشتکار بروقت بیجائی کریں تو بہتر پیداوار کے ساتھ ساتھ موسمی اثرات سے بھی فصل کو محفوظ رکھا جا سکتا ہے۔

وزیراعلیٰ پنجاب کا خصوصی زرعی پیکیج

اجلاس کے دوران بتایا گیا کہ وزیراعلیٰ پنجاب جلد گندم کے لیے خصوصی زرعی پیکیج کا اعلان کریں گی جس کے تحت کاشتکاروں کو کھاد، مشینری اور بیج پر سبسڈی فراہم کی جائے گی۔ اس اقدام کا مقصد پنجاب کو خود کفیل بنانا اور کسانوں کی آمدنی میں اضافہ کرنا ہے۔

حکومت اور عوام کا اشتراک

اجلاس میں شریک ڈپٹی کمشنرز نے اس عزم کا اظہار کیا کہ وہ ضلعی سطح پر کسانوں سے رابطہ بڑھائیں گے اور مہم کے اہداف کو ہر صورت حاصل کریں گے۔ اجلاس میں محکمہ انہار، محکمہ زراعت اور کاشتکار نمائندوں نے اپنے تجاویز بھی پیش کیں تاکہ آنے والے سیزن میں پانی، بیج اور کھاد کے مسائل کم سے کم رہیں۔

مسرت جبیں نے کہا کہ “اگر کاشتکار حکومت کی پالیسیوں سے بھرپور فائدہ اٹھائیں تو گندم کی فی ایکڑ پیداوار میں ریکارڈ اضافہ ممکن ہے، جس سے بہاولپور ڈویژن نہ صرف پنجاب بلکہ پورے ملک کی غذائی ضروریات پوری کر سکتا ہے۔”