چین کا پنجاب کےسیلاب زدگان کیلئے300ملین روپےکی امداد کااعلان

یوتھ ویژن نیوز ( ثاقب غوری سے ) وزیراعلیٰ پنجاب چوہدری پرویز الٰہی سے چین کے قونصل جنرل زاؤ شیرین نے ملاقات کی، چینی قونصل جنرل نے سیلاب متاثرین کیلئے300 ملین روپے کی مالی امداد کااعلان کیا۔

یہ بھی پڑھیں: وفاقی حکومت عمران خان کی درخواست خارج کرانے سپریم کورٹ پہنچ گئی

ایوان وزیراعلی میں ہونے والی ملاقات میں وزیراعلیٰ چوہدری پرویز الٰہی کو چین کے قونصل جنرل زاؤ شیرین نے چین کی حکومت اور پاکستان میں چین کے سفیر کی طرف سے خیرسگالی کا پیغام دیا، چین کے قونصل جنرل نے پنجاب میں سیلاب سے جانی ومالی نقصان پر اظہار افسوس کیا اورمتاثرین کی بحالی کے لئے تعاون کے عزم کااعادہ کیا۔

اس موقع پر مختلف شعبوں میں سرمایہ کاری، تعلیم اور دیگر شعبوں میں تعاون کو فروغ دینے پر تبادلہ خیال کیا گیا، ملاقات میں سی پیک پراجیکٹ کو آگے بڑھانے پر اتفاق بھی کیا گیا، وزیراعلیٰ پرویز الٰہی سے ملاقات میں چینی قونصل جنرل نے متاثرین سیلاب کے لئے مالی امداد کااعلان کیا۔

یہ بھی پڑھیں: عمران خان کی لائیو تقریر نشر کرنے کا معاملہ، لاہورہائی کورٹ سے بڑی خبر آگئی

چینی قونصل جنرل کا کہنا تھا کہ لاہورمیں چینی قونصل جنرل آفس کی طرف سے متاثرین کی بحالی کیلئے 300 ملین روپے کی امداد دیں گے، چینی قونصل جنرل نے وزیراعلیٰ پرویز الٰہی کی عوامی خدمات کو خراج تحسین پیش کیا اورکہا کہ مختصر عرصے میں چوہدری پرویز الٰہی نے عمدہ کارکردگی کا مظاہرہ کیا۔

وزیراعلیٰ چوہدری پرویز الٰہی نے سیلاب متاثرین کی مدد کے لئے تعاون پر چینی قیادت اور عوام کا شکریہ ادا کرتے ہوئے کہا کہ چین کا سیلاب زدگان کے لئے ٹینٹ اور دیگر امدادی سامان بھجوانا قابل تحسین ہے۔